தமிழக பாடப்புத்தகங்களில் தலைவர்களின் சாதிப்பெயர்கள் நீக்கம் .. பாடநூல் கழகம் அதிரடி ஆக்சன்...
சென்னை : தமிழ்நாட்டில் உள்ள பள்ளிப் பாடப்புத்தகத்தில் இடம்பெற்றிருக்கும் தமிழறிஞர்கள் , கவிஞர்கள் , அரசியல் தலைவர்கள் , சுதந்திர போராட்ட வீரர்கள் உள்பட தலைவர்களின் பெயருக்கு பின்னால் இருக்கும் சாதிப்பெயர்கள் நீக்கப்பட்டுள்ளன . திண்டுக்கல் ஐ லியோனி தலைமையிலான தமிழ்நாடு பாடநூல் கழகம் இந்த நடவடிக்கையை எடுத்துள்ளது . " தமிழ்நாட்டின் சாலைகள் , தெருக்கள் மற்றும் அலுவலக கட்டடங்களுக்கு தலைவர்களின் பெயர் சூட்டப்படும்போது அவர்கள் பெயரின் பின்னால் இருக்கும் சாதிப்பெயர் இடம்பெறக்கூடாது " என்று தமிழ்நாடு அரசால் அரசானை வெளியிடப்பட்டு நடைமுறையில் இருக்கிறது . இதன்படியே தமிழ்நாடு பாடநூல் கழகம் சாதி பெயர்களை பாடப்புத்தகத்தில் இருந்தும் நீக்கும் நடவடிக்கைகளை தொடங்கி உள்ளது .
தமிழ்நாட்டில் உள்ள பள்ளிப் பாடப்புத்தகத்தில் தமிழறிஞர்கள் , கவிஞர்கள் , அரசியல் ஆளுமைகள் உள்ளிட்ட தமிழ்த்தலைவர்கள் பெயர்கள் நீண்ட காலமாக அவர்களின் சாதி பெயர்களுடன் தான் இருந்து வருகின்றன . இந்நிலையில் முதல்வர் ஸ்டாலின் தலைமையிலான திமுக அரசு , பாடப்புத்தகங்களில் உள்ள தலைவர்களின் பெயருக்கு பின்னால் உள்ள சாதிப்பெயர்களை நீக்கியிருக்கிறது .
12 ம் வகுப்பு பாடம் :
தமிழ்நாடு பாடநூல் கழகம் மேற்கொண்டுள்ள நடவடிக்கைகளின் படி , 12 ம் வகுப்பு பாடப்புத்தகத்தில் இருக்கும் " பண்டைய காலத்து பள்ளிக்கூடங்கள் " என்ற பாடப்பகுதியில் , தமிழ்த் தாத்தா உ.வே. சாமிநாத ஐயர் என்றிருந்த பெயர் தற்போது உ.வே.சாமிநாதர் என மாற்றப்பட்டிருக்கிறது . ராமலிங்கம் பிள்ளை அதேபோல் மீனாட்சி சுந்தரம் பிள்ளை என்பதை மீனாட்சி சுந்தரனார் என்று மாற்றப்பட்டிருக்கிறது . மேலும் நாமக்கல் கவிஞர் ராமலிங்கம் பிள்ளை என்பதை ராமலிங்கம் எனவும் மாற்றி தமிழ்நாடு பாடநூல் கழகம் நடவடிக்கை எடுத்துள்ளது .
பாடநூல் கழகம் :
மேலும் தமிழின் முதல் நாவலாசிரியரின் மாயூரம் வேதநாயகம் பிள்ளை என்ற பெயரை வேதநாயகம் என்று மாற்றி உள்ளது . இலங்கையைச் சேர்ந்த தமிழறிஞரான சி.வை.தாமோதரம் பிள்ளை என்ற பெயரை சி.வை.தாமோதரம் என்று மாற்றி உள்ளது.இதேபோல் தான் பல்வேறு தலைவர்களின் பெயருக்கு பின்னால் இருக்கும் சாதிப்பெயரை நீக்கி தமிழ்நாடு பாடநூல் கழகம் புதிய திருத்தம் மேற்கொண்டு உள்ளது . விரைவில் அனைத்து வகுப்பு பாடப்புத்தகங்களிலும் சாதிகளை நீக்கும் , பெயர் திருத்தம் மேற்கொள்ளப்படும் என்று அறிவிக்கப்பட்டுள்ளது .
source : oneindia.com
